Miskien maak ek ‘n haikoe net uit klank
En bind ‘n strik van woorde om
Miskien word dit ‘n groter simfonie
Of dalk bly dit net kort en stom
Miskien weef ek uit note ‘n kombers
En dalk, wie weet, as dit kom reën
Dra jy dit, al is dit net ‘n lied
Soos jy, is ek ook dalk alleen

Dalk stuur ek vir jou ‘n vers wat in die donker blink
Want taal, wat in die swart en diepste duister klink
Is ook – al rym dit goed – tog net ‘n bietjie bang
Kan verlang

Miskien is daar ‘n kamer met ‘n spieël
‘n Kind wat stadig daarin draai
Miskien dans ons ‘n baie ou pavane
Maar word ons deur musiek verraai
Miskien is dít wat ek en jy in glo
Bloot kole in ‘n nanag vuur

Musiek en woorde – dalk die liefde self –
word leuens in hierdie laatnag uur

Miskien maak ek ‘n haikoe net uit klank
En bind ‘n strik van woorde om
Miskien word dit ‘n groter simfonie
Of dalk bly dit net kort en stom
Miskien weef ek uit note ‘n kombers
En dalk, wie weet, as dit kom reën
Dra jy dit, al is dit net ‘n lied
Soos jy, is ek ook dalk alleen