Zo röstig en tevree, roukend de gansen daag.
Want zörg kènt hae neit mee, eine dae neit klaag.
Want oos goud auwt Zitterd, de Wal en de Wieer,
is hööm zie laeve, hööm zie vertier.

Zefke Mols, auwt, gries en versjleete,
is eine van oos sjadtsprofeete.
Mit zien medaajes oppe boek,
grieze baard en piepke in de mòndj,
löp hae de gansen daag in Zitterd ròndj.

Wauwelend in zien eige zit 'r op die brök.
neit kletsje en neit leege, eine mit 't waar gelök.
Want van al daen herrie in de welt wit hae niks aaf.
Daorom is zie laeve zo sjoon en gaaf.

Wie is op vandaag 't laeve, veer ligge aan bènj.
Veer wirke en v'r sjtraeve, v'r biete oppe tènj.
Mer zout veer net wie hööm op die brök,
jao, dan koosj veer 't waar gelök.


(c) Tekst & muziek: Jo Erens