Ik hè vannacht zo slecht geslapen
'k was veel te laat in mijn bedde gerocht
maar 'k ben van de mare bereden
deur 'n duvel en zijn moere bezocht
't was gisteren een prachtig feestje
we dansten de charleston
en w'aten en dronken met vrienden
mes amis Moët & Chandon
maar z'hèn mij vreselijk bedrogen
'k ben ziek en 'k ben beestemoe
't rammelt en 't dampt in mijn darmen
mijne kop zit vol rattatoe

Al de bokkepoten uit d'helle
ze kariotten vocen op mijn dak
en ze schommelden onbedaarlijk
en ze schudden aan mijn beddebak
daar stond in den hoek van mijn kamer
de schijnheilige Saint Emilion
nevens hem een koeachtig monster
warempel nen boeuf Bourguignon
mag ik 's avonds misschien nie meer eten
van die room en pattattepuré
moet ik daarom heel de nacht boeten
deur die taarte van Saint Honoré

Ik wenteld' en 'k woeld' in mijn bedde
lijk nen paling levend gevild
'k verzoop in de sauce béarnaise
gelijk nen côte à l'os gegrild
daar kropen krabben en kreeften
tussen de lakens van mijn bed
daar wierden roze zalmen
op mijn hoofdkussen gezet
en wat ded Saint Estèphe daar in 't donker
die gebottelde lelijkaard
een dozijn escargots de Bourgogne
kropen slijmerig over mijn baard

'k Hè vannacht kiekens en konijnen
hele kalvers gevierendeeld
mijn kamer hing boemvol kadavers
allemaal eigenhandig gekeeld
gepeperd, gezouten en gebraden
geflambeerd met de beste Cognac
lag alles te branden in mijn mage
mijnen buik was nen doedelzak
pensen en darmen en saucissen
puré paté fricassé
van de vleespotten van Egypte
een kilometers-lang-défilé

Oesters en al sprakeloze diertjes
'k versmaadde noch mossel noch vis
'k hè gezworen van mij te bekeren
'k smeek u allen om vergiffenis
wat heb ik al nie gevreten
muskusrat zelfs krokodil
maar nu weet ik deur die nachtmerrie
maar al te goed wat da'k wil
ik word radikaal vegetariër
'k eet zuurdesemvolkorenbrood
geen bloed nie meer aan mijn handen
ik doe zelfs geen ei meer dood

Vandaag eet ik rapen en bonen
een simpel radijsj' als entree
wat sesamzaad op mijn boterham
en een tasje rozebottelthee
ik ga met de kiekens gaan slapen
ik word streng macrobiotiek
ik verzaak aan wijn en likeuren
aan Rodenbach, Geuz' en Lambiek
dan ben ik morgen weeral genezen
ben ik morgen were kerngezond
zwijg mij van krabben en kreeften
of 't water komt alweer in mijn mond

Eerst nog veertig dagen vasten
en dan bidden tot Saint Emilion
breng mij gauw mijn gevleesde vrienden
et mes amis Moët & Chandon

Tekst & Muziek : Willem Vermandere