Jerusalem ghij schoone stat

Jerusalem ghij schoone stat 
 Hoe staet ghij hoog in mijn behagen
Mijn ooghen sijn van vreuchden nat
Mijn herte doet ghij naer u jaeghen

Schoon Vaderlant schoon Vaderlant
Gods allertriumphantsten throone
In u is Rijckdom abundant
O salich die u krijchten loone

U mueren sijn van goude fijn
Bestroeyt met peerlen sijn u straeten
In u en is gheen sonneschijn 
Want ghij schijnt selver boven maten

Ick ben hier in het tranen dal
Den hoogsten Thabor is daer boven
Och laat mij met u vrienden al
U majesteit eens salich loven
          -----------------------