me woarn e kleen kleen sleutertje kwiet
van ’t tuunhuus in den hof
me vrouwe zei d’noend et ingeslokt
zien oogn stoan veel te dof
z’et toene up d’noend stoan kieven
en ik ik wild’em sloan
mor ik peisde ton
da got ezo nie goan

nu moej weten dat 
uuzn noend e stegen is
em doen ofgoan 
dat is gin kattepis
dat deurt soms dagen
voor datn ie em oentlast
dus emme doar in dit geval
e mouwe an gepast

m’en em toen e heel zwoar 
laxeermiddel gegeevn
en ik zien d’er 
e heeln dag bie gebleevn
mo ’t zat gin schuuf in 
ne kakte nie
dus koste ‘k ik nog oltiet
an mien grasmachine nie

m’en em toen meegedoan
no den Unief in Gent
ze zien doar toen begunn
met e groendieg lavement
ne nad d’er deugd van 
ne wos heel blie
mo da kleen sleutertje
dat amme nog ossan nie

dat kleen kleen sleuteltje 
zei toen die professeur
dat zit verzekers vast
e twosen a l’interieur
dus dein ze neen echo
en neen endoscopie
mo da kleen kleen sleutertje
dat zaagn z’in ’t hele nie

m’en toen oentgoocheld
de rekenieng betaald
me vrouwe et dus mo
eur portmannee uuthaald
wat emme doar toen 
verwoenderd vastgesteld
dat kleen kleen sleutertje
zat geweune tuschen eur geld