mien gebeur kwam moandag vraagn, wil je mien tuunset binnendraagn
ik ik meugn dat echt nie mi probeern, of ‘k gon ’t me were moeten beklaagn
want
mien oofd, mien schoern, me knien me teen
mien oofd, mien schoern, me knien me teen
ik ik en artrose lik gineen, an mien oofd, mien schoern, me knien me teen

dinsdag kwamt’em were smeekn, wil je mien vetkiekns binnensteekn
’t lign nog reedlijk vele steen in ulder perk, en ‘k zoen niet geern e twodde breekn
want
mien oofd, mien schoern, me knien me teen
mien oofd, mien schoern, me knien me teen
ik en osteoporose lik gineen, an mien oofd, mien schoern, me knien me teen

woensdagnuchtend reedlijk vroeg
wasn em doar were en ne vroeg
wil je gie mien vuulzak buten zetten
woarachter dat’n em were kloeg
vint
mien oofd, mien schoern, me knien me teen
mien oofd, mien schoern, me knien me teen
ik ik zien versleten lik gineen, an mien oofd, mien schoern, me knien me teen

en ook dunderdag jawel, wos mien gebeur weer up ’t appel
onk meschien zien koer wilde komn vaagn
ne voelde em lik nie goed in zien vel
want
zien oofd, zien schoern, ze knien ze teen
zien oofd, zien schoern, ze knien ze teen
overol at’n em kniezing lik gineen, an zien oofd, zien schoern, ze knien ze teen

en ook vriedag roend de noene
kwame ‘k ik were biekan groene
ne vroeg of dank zien noto nie kostn kuuschn
ne wilde geern e toertje doene
en
zien oofd, zien schoern, ze knien ze teen
zien oofd, zien schoern, ze knien ze teen
ne wos doar were an’t janken lik gineen, over zien oofd, zien schoern, ze knien ze teen

zoaterdag peisde’k alli
’t go vandage lukken si
mo ommeki kwamt’n vraagn voe no de boereboend te rien
want ne nad ie gin kieketeten mi
en
zien oofd, zien schoern, ze knien ze teen
zien oofd, zien schoern, ze knien ze teen
’t was ol were heel den dag ofzien lik gineen, met zien oofd, zien schoern, ze knien ze teen

zundag peisde’k nondedju
is’n ie doar nu werklijk weerol nu
stakt’n em doar toch wel were zien kop over de ploatn
ik kokte en ik riepn toen reedlijk cru
hei gebeur
voe joen hoofd, joen schoern, joen knien, joen teen
voe joen hoofd, joen schoern, joen knien, joen teen
bestoan d’er ol van olle soortn deugdlijke protheesn
en oj d’er geld voorn nodig et wiln ‘k ik wel leenn