’t oed gemeentuus getuugt van e heel ver verleedn
toet in ’70 was Bovekerk’apart
’t schild in de gevel hangt doar nu zoender reedn
en de post is’t doar ook aangeschart
d’oude schole doarenteegn is oast oltiet bezet
gin vereniging die doar nooit nie zit
je meugt’r eetn drienkn en dansn mo beste menschn upgelet
je moe maakn da Marcel d’ervan wit
en daj Sabam nie vergit

’t aantal zielen is ol joarn achteruut an’t loopn
mo ’t droait nog oltn’tnd a peu prés roend de duusd
ja up ’t vlak van genoeg nieuwe kiendertjes koopn
is Bovekerk’ol joarn zwoar gebuusd
die nieuw’uzen up de platse, da’s e heel goe begun
da’s en heel’n oop nieuw’inweuners wei
’t is mo t’oopn dat Micheltje dat meester go kunn
toet buutn gon ze stoan in e rij
met de Lotto , achter e plastron en een ei

‘k weun’ ier geern
‘k zoen liegn moest’uk tegendeel beweern
ik ken ier de menschen 
en de menschen ken mien
en ‘k meug zeg’n dank ik mien ier geneern
‘k weun’ier geern
hoe dat’t komt kun’k ik nie expliceern
’t is hier echt niet speciaal
’t is ier redelijk banaal
mo da’s e twot dank ik kun apprecieren
en dank geern observeern

de fanfare et de kioske in ere ersteld
schone zake dat da koste gebeurn
mo met ulder lokaal is’t iets minder gesteld
’t groeien doar uusjes van Plop up de meurn
an verenigiengn ist’er ier echt gin gebrek
m’en van olle soortn pret en verzet
ook de volkssportn zien ier nog oltiet in trek
en et de vrouweboend ne knutselavend get
toen kuj dat zien oj ulder voordeurn belet

dat de paster vertrok, da zinde uus nie
geen kopies mi, ’t was eventjes wenn
mo gelukkig is ’t er wel nog een apothekerie
voe ne Kestboom moej doar gin voorschift en
uuzne scheepn zit oltiet te beln an zien steur
’t got deurn toet datter e combi passeert
en den brouwer zorgt af en toe voe ne primeur
surtoet otn achteruut maneuvreert
j’is ie in woater met heel vele goaze gespecialiseerd

‘k weun’ ier geern
‘k zoen liegn moest’uk tegendeel beweern
ik ken ier de menschen 
en de menschen ken mien
en ‘k meug zeg’n dank ik mien ier geneern
‘k weun’ier geern
hoe dat’t komt kun’k ik nie expliceern
’t is hier echt niet speciaal
’t is ier redelijk banaal
mo da’s e twot dank ik kun apprecieren
en dank geern observeern

dat de nateur vele macht en gin medelijden et
dat emme e poar joar geleen goed gevoeld
Gertrude et e tiedje gin werk nie mi get
Ol de ratten woarn up slag weggespoeld
Mo voe dreeste is ’t ier rustig mo n’een tip toch meschien
J’oed d’er best wel rekenieng mi
Oj me je velo van de platse no Vladslo wilt rien
Daj moet upppassn da’s lik Paries Roubaix
En dat Paul Vanhoorn zoe durvn zegn “’t is hier reks te rien wi !”

Gin nachtvluchtn ier, geen zwoare industrie
Gin hold-ups up kloarluchten dag
En de keunink emme ier ook nog nooit nie gezien
’t zal zien dat’n van Pola nie mag
oj gie echt wilt relaxen,  is’t ier daj moe zien
want ier verlies j’ol je stress
behalve oj up Masko een adres moe zien te vien
Ik gon joen zegn dat dat nie simpel is
Toen kop je beter ne goe GPS

‘k weun’ ier geern
‘k zoen liegn moest’uk tegendeel beweern
ik ken ier de menschen 
en de menschen ken mien
en ‘k meug zeg’n dank ik mien ier geneern
‘k weun’ier geern
hoe dat’t komt kun’k ik nie expliceern
’t is hier echt niet speciaal
’t is ier redelijk banaal
mo da’s e twot dank ik kun apprecieren
en dank geern observeern