Eartiids brocht er nijs mei in protte sensaasje 
wêr't er mar kaam mei syn luit of syn lier 
no is hy dekor foar de ferdivedaasje 
syn fersterker fersterket de omset fan it bier 

Kaam hy yn in herberch: elts hong oan syn lippen 
se dronken syn lieten en fregen om mear 
se hingje oan de bar no in pilske te wippen 
en freegje: dochst dy fan Frank Bauer in kear? 

Trûbadoer, dat is tsjintwurdich in hiele toer 
trûbadoer, dêr is tsjintwurdich hast neat fan oer 

Foar 'mans en in slokje' song hy syn ferhalen 
en frege er om sliepplak, dan wie dat net raar 
no fret it publyk fan de salm en garnalen 
en krôkje se lûder as syn gitaar 

En dochs wurdt er frege yn doarpskroech of tinte 
al baalt er dat nimmen noch heart nei syn liet 
mar ek hy hat in hypoteek op 'e klinte 
en dus kin it net oars as dat er hjir stiet 

Trûbadoer, it is soms krekt in aventoer 
trûbadoer, dat ik hjir stean fyn ik wol stoer 

Mar wat der ek bart, wat ik ek fiel 
mei ielt op de fingers en ielt op de siel 
somtiden 'kwatta', dan wer in rôle drop 
kom op, ik wol spylje, dûbeld fel foar de kop 

Hy spilet foar earmen, hy spilet foar riken 
wat dat oanbelanget feroaret der neat 
mar syn manager regelt syn drokke wiken 
hy hat sponsors en fans en wurdt subsidieard 

Op elk sjongfestivaltsje komt er fanwegen 
en karriêreplanning, hy wit hoe't it heart 
hy makket CD's as siet men ferlegen 
syn clips kin men dellade fan ynternet 

Trûbadoer, hy is noch net op syn retoer 
trûbadoer, unplugged wie eartiids sûnder snoer 
trûbadoer, dy DVD's binne ferrekte djoer 
trûbadoer, bin ik net thús dan bin ik on tour 
trûbadoer, wy sjonge hjir foar jim fol fjoer 
trûbadoer, is it net nei it sin dan dogge wy it oer