Ik skow mar wat nei lofts en ik skow mar wat nei rjochts 
soms doch ik wer wat stoms en soms doch ik wat trochtochts 
ik stoarje oer it boerd, wat stean ik wer beroerd 
ik ha noch mar ien skiif en sy in stik as fiif 

Tweintich houtsjes wyt en tweintich houtsjes swart 
foar de rún lâns is in start, ja it is in sport apart 
sy komme oeral wei, sa 'n moaie dammersdei 
elke klup mei man en miich, soarget foar in wiere kriich 

Helje 'n wolf, slaan nei daam, 't oerhoeks binn 'k nea ta kaam 
mar ik ha benul fan it Fryske spul, en it is wol sa foarnaam 
slaan rjochtút, slaan oerdwers, ik sjong inkeld mar dit fers 
gjin flauwe kul, it Fryske spul, en ik jou de rún in raam 

Ferlies as kamp as winst, betink ast der mei begjinst 
dan giest yn 'e lange tsjinst, omdatst neat oars mear kinst 
elke set, elke partij, spilest hyltyd wer opp'nij 
it hat dy yn 'e macht, elke dei en elke nacht 

It hat sa 'n eigen sfear, der wurdt spile foar de ear 
en ik bin alwer klear, ja ferlieze docht wol sear 
dit spul dat ik soms haat, 't is myn fijân en myn maat 
no sit ik yn 'e kroech en topsport makket droech 

Der is altyd wol wat tiid, by wat ik sil en wat ik doch 
nei de kapper, nei 't wurk, efkes tusken 't melken troch 
ik nim it altyd mei, yn de bus en yn de trein 
nei de winkel, nei de Turk, nei 't kafee yn Easterein