O salich, heylich Bethleem, 
o onder duysent wtvercoren, 
vereert boven Hierusalem, 
want Jesus is in u gheboren.
 
O Bethleem cleyn groote stat, 
cleyn van begrijp, maer groot van weerden, 
ghy zijt dat aldereelste vat 
end' alderrijckste stadt der eerden.
 
Ghy hebt het firmament ghemaect, 
al waer u loven s' hemels gheesten; 
maer nu gheheel blood ende naect 
light ghy int middel van de beesten.
 
O Coninck Christe prince groot,
Hoe wordt ghy hier aldus ghevonden? 
In hooy, in stroo in sulcken noot,
In arme doecxkens teer gewonden.
 
Verheucht u dan O Israël
Hoe mocht m’u blijder bootschap bringhen?
Tot u soo comt Emmanuel,
Wilt wt der sonden slaep ontspringhen.