Een seraphinsche tonghe 
my nu wel dient voorwaer,
een kele die wel songhe
met soete stemme claer,
om t' kindeken soo cleene,
gheboren, soomen siet,
van eender maget reene,
te loven met een liedt.
 
Sijn twee bruyn oochskens schoone
en zijn mondeken root,
sijn ledekens idoone,
sijn handekens minioot,
die tooghen ons de weghen
die wy moeten ingaen,
op dat wy al den zegen
van hem mogen ontfaen.