Dj'a k'nohou on gayård qui s' louméve Louwis
Èt qu' djouwéve dè l' guitåre come s'i d'véve mori.
On djoû, c'èsteût l'osté, po l' fièsse di Marèye,
I tûsa : «C'èst l'moumint di fé l' compte di m' vèye.»

C'èsteût l' Gros, Gros Louwis. (bis)

Louwis ovréve à Lîdje ås contribucions,
Ca n'èsteût nin sins qualificåcions.
I d'héve : «Dji pice lès p'tits qui frôdèt on pô
«So l' timps qui dj' sêre lès-oûys so lès gros mag'zôs.»

A fé crohî lès djins, i n' trovéve nole djôye.
On k'minça à trover qu'èsteût lôyeminôye,
Èt po bin lî mostrer qu'i måkéve di zéle,
On lî dèrit : «Louwis, vos baguez po Brussèles.»

Brussèles è-st-ine fwért bèle vèye,
Mins Gros Louwis hapa ine miråcolèye.
I d'héve : «Dji fê portant tot çou qu'i fåt,
«Mins n-a trop' di chèfs qui sont dès halbôssås.»

Adon, li qwinze d'aous', po l' fièsse di Marèye,
On l'a vèyou intrer d'vins in-årmûr'rèye.
I d'ha tot dreût : «Dinez-m' in-ustèye
«Po fé å pus djusse li compte di m' vèye.»

C'èst près dè l' rowe Ista qu'on l'a r'trové.
È s' tièsse rôlît tos lès vints dè l' leune.
L'aveût l' coûr trop grand, on pô fayé,
Mins dj' so djinné quand dji veû l' meune,
À costé.

Dji r'vins co 'ne fèye à m' vîx copleûs,
Ca dj'a sogne di d'ner ine fåsse îdèye,
Si vos pinsez qu'èsteût tot seû
À s' monter tote ine comèdèye.

Quand il apicéve li Fender,
Li leû-warou div'néve Winter.
Mi, dji m' prindéve po Fleetwood Mac.
On féve on concoûrs di reûd-dag'.

C'èst lu on djoû qui m'aprinda
À acwèrder en open di la.
Po djower l' blues, i v' fåt çoula,
Ou v' n'èstez qu'on marlatcha.