N' volà-t-i nin qu'on bê matin, (bis)
L'ajant d' cårtî, Moncheû Frenay, (bis)
Mi dit : «Elmore, dji v' deû houkî,
Ca v's-avez fêt ine saqwè d' lêd.»

D'vins tote mi vèye, dji nèl nôye nin, 
Dji n'a nin fêt qu' dès bèlès keûres,
Èt dji so d'on tampéramint
À piède on pô l' tièsse à tote eûre.

Mins disqu'à ç't-eûre, crèyez-m' s'i v' plêt, 
On n' m'aveût co trêtî d' cûrèye.
Ca l'ajant m' dèrit : «Elmore D,
«On vis-acûse di grivèl'rèye!»

Dj'a lé bêcôp dès dicsionêres,
Èt dji k'nohe tote ine riguinêye
Di mots qu'odèt 'ne saqwè qui flêre,
Mins l' pés, mutwèt, c'èst l' grivèl'rèye!

Magnî dè rosti sins payî,
Si såver après 'ne cråsse eûrêye,
Fé pèter l' champagne èt lèyî
Li note so l' tåve : c'èst l' grivèl'rèye!

À 'ne bèle rossète fé avoyî
Dès rôses ou minme ine dorêye,
Tot lèyant, po l' fé arèdjî, 
Li nom d'in-ôte : c'èst l' grivèl'rèye!

Mandrin, Cartouche, Tchantchès Villon,
Fez-m' vite ine plèce è l' confrêrèye,
Qui dji scrèye sins tårdjî 'ne tchanson
Qui påy'rè mès frês d' grivèl'rèye.