Bondjoû Walonîye,
N-a si longtimps,
Si longtimps qu'on s' ratind.
Poqwè r'mètans-gn' à d'min
Çou qui s' deût fé à l' fin?

Walons èt Flaminds,
N' louk'rît pus d' vins
D'vins l' cot'hê dè vwèzin.
Poqwè r'mètans-gn' à d'min
Çou qui s' deût fé à l' fin?

Tot-avå dj'ètind:
«N'èstans-gn' nin bin,
Divins l' pitite Bèljique?»
Èco fåreût-i dîre
Di qué costé on vike.

È l' cåve ås pèlotes,
Fåt apicî totes
Lès tchances èt lès-atotes.
Poqwè r'mètans-gn' à d'min
Çou qui s' deût fé à l' fin?

Divins lès gazètes,
Lès djins dè l' jèt' sèt',
Avou dès-årtisses,
Tos glètèt po l' payis.
C'èst todi pus-åhèye
Dè l' dîre dispôy Paris.

Mins qui va-t-on fé,
Dè l' bèle Brussèles,
Avou tos sès tunèls?
Bin! qu'èle dimeûre tèle quèle,
Ine grande toûr di Babèl.

Tot çou qu'èst podrî,
Poqwè n' nin l' lèyî
È fî fond dè grignî?
Poqwè r'mètans-gn' à d'min
Çou qui s' deût fé à l' fin?