Pulènta e galèna frègia 

e un fantasma in söe la veranda 

barbèra cume' petròli 

e anca la löena me paar che sbanda...

cadrèga che fa frecàss

e buca vèrta che diis nagòtt 

dumà la radio sgraffigna l'aria 

e i pensee fànn un gran casòtt.... 

 

L'è mea vèra che nel silenzio 

dorma dumà la malincunìa

l'è mea vèra che un tuscanèll

l'è mea bòn de fa una puesìa

in questa stanza senza urelògg

bàla la fata e bàla la stria

in questu siit senza la lüüs

che diis tücoos l'è duma' l'umbrìa....

 

E scùlta el veent che pìca la pòrta

cun in cràpa una nìgula e in bràsc una sporta

el diis che g'ha deent un el regàal

me sa che l'è el sòlito tempuraal....

E scùlta i spiriti e scùlta i fulètt

che ranpèghen söel müür e sòlten föe di cassètt

g'hann söe i vestii de quand sèri penènn 

i ne vànn e i ne vègnen cun't el büceer del vènn...

 

E la candela la sta mai ferma

e la se möev cumè la memoria

anca el ràgn söe la balaüstra

ricàma el quadru de la sua storia

la ragnatela di mè pensèe

la ciàpa tütt quèll che rüva scià

ma tanti voolt la g'ha troppi böcc

e l'è tüta de rammendà....

 

La finestra la sbàtt i all,

ma la sà che po' mea na' via

e i stèll g'hann la facia lüstra

cumè i öcc de la nustalgìa

in questa stanza senza nissöen,

vàrdi luntàn e se vedi in facia 

in questa stanza de un òltru teemp,

i mè fantasmi i làssen la traccia.....