In de jaren twintig dertig
Leefd' alhier in 't vlakke land
Nen artist in hart en nieren
Nen kloeken telg van 't vlaanderland
Daniël kapte grote beelden 
in blanke marmer en graniet
Ie boetseerde en ie moeleerde
Nen handiger'n duvel bestond er niet
Nen handiger'n duvel bestond er niet

Maar wat wil 't volk van 't arm vlaanderen
Nen platte steen voor op zijn graf
Laat die artiesten maar kreveren
Koop ze maar liever nen bedelstaf
Bie Permeke en Verschaeve
Verdiende Daniël dan zijn brood
Ie kneedde de klei tot Lievenheren
Of ferme vrouwen, naakt en bloot
Ferme vrouwen, naakt en bloot

En een brood mag j' iedereen geven
Maar nooit niemand geen slechte raad
Naar het oosten trok dan Daniël
Wist er van den Duits geen kwaad
En daar kapt' ie en boetseerde
Naar 't antiek Griekse model
Germaanse helden en heldinnen
In een blinkend marmeren vel
In een blinkend marmeren vel

Ah, ik leefde in de wolken 
in Arno Brekers' atelier
Ik hè met Goebbels nog pinten gedronken 
in een oud Berlijns cafe
Wist je dan echt niets van die wapens
En van de führers duvels plan
En van die onschuldige jodenkinderen
Daniël, wist je daar echt niets van
Daniël, wist je daar echt niets van

Ach, ik wistte niets van Dachau 
en van Auschwitz al evenmin
Maar dan is mijn herte gebroken
Ben ik gestorven diep binnenin
Achter tralies hè'k dan gezeten
Met mijnen honger en mijn groot verdriet
Naar Argentinië uitgeweken
Mijn vrouwe en mijn hope, met meer niet
Met mijn vrouwe en wat hope, met meer niet

Pottenbakker is ie daar geworden
In een nederig werkmanskleed
Om zijn ziele te doen genezen
Dag en nacht de klei gekneed
Daniël's huis stond wagewijd open
Met arme luizen zijn brood gedeeld
En zo is daar ook den tijd verstreken
Den tijd die alle wonden heelt
Den tijd die alle wonden heelt