Jezus is were op d'eerde gekomen
met 't haar deur z'n klakke juist lijk overtijd
hij tjoold'ie maar rond van 't ene naar 't ander
hij was hier nog maar en 't was al mè spijt

Hij moest 't al herdoen van jaren geleden
't was al mislukt hij had het gevreesd
let goed op j'n spel zo zei God de vader
want zie ze ne keer vechten en drinken om ter meest

Hij kon ie niet beter dan voor pater leren
of liever voor paster hij had geld genoeg
en mè zo'n relaties hij gonk't verre brengen
misschien wel tot bisschop als 't hèm schone vroeg

En vragen dat kon hij en klappen nog beter
hij was kardinaal nog eer dat hij 't wist
hij ging nu geregeld op grote voyage
hi heeft nooit zijnen trein voor Rome gemist

En waren ze verstrooid of was 't een vergissing
in alle geval hij wierd paus benoemd
hoe is 't toch Gods meuglijk, Jezus ons here
zat nu in Rome over Boeken gekromd

Tedju, klonk 't in den hemel, tedju, nondedju
mijn zoon is bedrogen en schandelijk misleid
door die kardinalen met mijters en ringen
'k had het hem pertankt nog zo goed gezeid.

(c) Willem Vermandere