D’er is e kiendje geboorn up d’n tv
D’er is e kiendje geboorn up d’n tv
Up VTM, VT4 en VRT
Up VTM, VT4 en VRT

De mama adde openieng ol meer dan genoeg
De mama, ze steende, ze kreund’en ze kloeg
Mo ze moest nog wachten want ’t was nog te vroeg
Want ze woarn nog nie greed met de cameraploeg

Ot de mama toen eindlik eur kiendje gienk koopn
Toen wierd ze doar toch were halt toegeroopn
Toen kwam de grimeuse oast up eur gekroopn
Want de mama’s mascara was e bitj’uutgeloopn

Beist dat ze an’t werk woarn an mama’s make up
Pakte de camera de papa in close-up
Want de papa viel omme lik n’een droenkoard an’d’n toog
En ne scheurde de schorte van de gynaecoloog

De regisseur was doar heel bliede mee
Ne riep, da’s pas echt reality tv
Toen begoste de mama were heftieg te bloazn
En toen liet’n em de micro nog e kleen bitje noazn

De mama et eur kiendje toen verzichtjes gekocht
En de papa was intuschen ook were rechte gegrocht
Ze vroeg’n ot’n de navelstreng deure wilde snien
Ne begoste ol were te bibbern up zien knien

De regisseur zei gedroag je lik ne vint
Je moet doen lik ne burgemeester die knipt in e lint
De papa ne knipte toen goed komma tuut
Mo ne sneed in zien vienger en ’t bloed spoot d’eruut

De regisseur zei da kumme nie negeern
Zo’n dankbare climax, da moet’n me filmeern
Ne zei teegn de mama, bluuf gie me ’t kiendje mor ier
Me gon nu met de papa nor ’t operoasjekwartier

D’er is e kiendje geboorn up d’n tv
Dat viel doar uuteindlijk nog reedlijk goed mee
De mama en ’t kiendje, ze kwaamn goed in beeld
En de papa et toen ook nog in spoed meegespeeld
de papa et toen ook nog in spoed meegespeeld