ne pezewever wilde no de fitness eki goan
mo ne voend da wel redelijk diere
ne peisde meschien got dien boas mien verstoan
‘k gon meschien meugn betaaln per spiere
ach mien biceps en mien kietn en mien gat
zien geweun lik kerremelksmeus zo plat
en azo kuj gin vrouwn versieren

ot die pezewever ton bie de fitness aankwam
was’t doar ommeki up slag luzestille
den boas vroeg worom da’n gin lidkoarte nam
en ne zei ‘k zoen begunn met één bille
oei oei oei peisde den boas wuk ne wietn
‘k gon em zere up de testbank gon smietn
dat wordt bruln en giern en gillen

den boas zei me joen got da nie simpel zien
joen beenn zien lik sulferstokken
teegn daj gie go spiern en lik deze van mien
dat wordt werken en zweten en knokken
alle gow leg je doar up dien bank
gif mo pulle in ’t breed en in ’t lank
mo makt osjeblief gin brokken

dien pezewever gienk toen an’ t trekn en an’t sleurn
was me dat e komieke ramulte
zien wezen begoste ol wreed te verkleurn
achter twee menuutn zeidn “’k en mien vulte”
mo den boas zei “verbiet mo de pien”
je meug gratis één eure van mien
ol de menschen ze lacht’n uldr’ e bulte

z’en dien pezewever ton met twee riemn vastgeboendn
en ze zeidn dat dat was tegen ’t vollen
z’en zien beenn en zien ormes en zien kop toen omwoendn
met toiletpapier en keukenrollen
en ze zeidn dat da was teegn kwetseurn
dan ze spiern anders zeker giengn scheurn
en ze peisden mor is da ne roenden

mo de leute wos ommeki toch rap gedoan
diene gast kost er nie mi goed tegen
neen is uup dien bank begun schuppen en sloan
en dat spil is toen flikke geslegen
ne zat ommeki helegans vast
z’en toen zere e poar buuzn deuregelast
en als troost et’n e lidkoarte gekregen