Ons lê hier langs die pad
Ek en my bottel
Die mense loop verby
Dis vroeg in die oggend
 
Ons lê hier soos geliefdes
Verstrengel in mekaar
Sy is leeg van my
Ek is vol van haar
 
Ek was ‘n paar jaar in die weermag
Geveg daar op die grens
Die bos daar het my mal gemaak
Maar nou is ek weer ‘n mens
 
Ek het die land hier sien verander
Selfde storie ander boek
Ek is die bruinman in die middel
Nooit wit of swart genoeg nie
 
Sy is alles wat my reg hou
Sy is al wat my laat val
Sy is die liefde van my lewe
Sy’s my Heelal
Sy’s my sonde my verlange
Sy’s my honger en my dors
Sy’s is die onmag wat my vashou
Sy’s die vrou
Wat my nooit sal los nie
 
Ek is ‘n swerver in die stad hier
Slaap daar buite by die hek
Van die Kompanjie se tuine
Voor die useless parlement
Waar hulle praat en praat en praat
Oor die toekoms van die land
Ek lê daar buite en ek slaap
Met ‘n bottel in my arms
 
Sy is alles wat my reg hou
Sy is al wat my laat val
Sy is die liefde  van my lewe
Sy’s my Heelal
Sy’s my sonde my verlange
Sy’s my honger en my dors
Sy’s is die onmag wat my vashou
Sy’s die vrou
Wat my nooit sal los nie
 
En ek droom soms van‘n meisie
Met rooi lippe
Wat met my dans
Tot anderkant die maan
 
Verby die wolke
Verby die sterre
Daar waar die hemel nog bestaan
 
My bottel      My booze
My Lullaby    My blues
My hemel      My hel
Die naam      Op my vel
My sonde      My verlange
My honger     My dors
Die onmag wat my vashou
Die vrou
Wat my nooit sal los nie
 
Sy is alles wat my reg hou
Sy is al wat my laat val
Sy is die liefde  van my lewe
Sy’s my Heelal