Ek al hawwe wy gelyk
tûzen kear gelyk
en bin wy siik fan ûnwennigens
nei in oare wrâld, in hegere wrâld
lit ús net begearlik wêze
lit ús ûndergean

Want wa’t hjoed-de-dei oerlibje wol
yn ús noflike, oermoedige wrâld
moat gjin honger hawwe
se sille ús, wy (do en ik) dy’t pretinsjes ha,
útspuie en oan ‘e kant sette 

It is it lawaai, en net de muzyk,
it is de wille en net it gelok,
it is de leafde en net de hertstocht,
it is it jild en net de siel,
dy’t fan ‘e wrâld ús tehûs meitsje,
wy dy’t net ûnstjerlik binne