Dji tchoûkîve mi tchèrète vès lès kêsses dè G.B.,
Qwand dji l'a vèyou v'ni, di l'ôte costé.
Dj'a tûzé: «Nom di Djo, qu'èll'èst bèle!
Dji dîreû come Cochran:
Waw! She's something else!»

Èll'èst trop tchôde por twè. (bis)
Ti pous fé çou qu' ti vous,
Èll'èst trop tchôde por twè.

Li lèd'dimin, c'èsteût l' djoû dè martchî,
Dj'ala qwèri m' gazète, avou 'ne bote di radis.
Å min.me botike, èle prindéve dès rècènes,
Ça n'a sièrvou à rin qwand dj' lî fa on p'tit sène.

À l' cwène dè l' rowe d'Erquy, i-n-a on cwèfeûr,
Wice qui dj'va di timps-in-timps po m' mète di bone oumeûr.
Èll'èsteût là, dj'èl loukîve è mureû,
Tot glètant come on rèmoudou d' treûs meûs.

L'ôte djoû dj'èl rèsconteûre è bus 7,
Mins mi tchanson por lèy n'èsteût nin prète.
Dj'aveû co 'ne fèye mès-oûy d'inglitin
Èt dji souwéve dès gotes come dès peûs d' rèzin.

À l' nut ', qwand fêt bin neûr, dj'apougne mi longue lunète
Èt dj'inspèctèye li manîre qu'èle si nète.
Dj'èsteû gripé à l'åbe qwand l' police m'a vèyou
Èt m'a dit: «On vout loukî avou...»

Dji n' va måy à l'èglîse qu'ås-ètèr mints,
Èt ç'èsteût l' meune, djustumint.
Li curé diha, divant m' wahê:
«T'èsteûs portant on fameûs pourcê!»

Avou mès cint kilos dji monte å cîr
Èt dji d'mande l'ome qu'on lome sint Pîre.
On m' dit: «I n'èst nin là, i s' marèye
Avou 'ne båcèle qui sèreût d'Oupèye»....