Li loumîre, on l' Haust distint,
On côpe lès-amplis.
Vocial vinou l' moumint,
D' dîre « Å r'vèy,
Èt mèrci ».
N-a nin d'amis
Qui n' si qwitèsse dès fèyes.
Èt qwand c'èst fini,
C'èst fini.

Li groupe s'a rassonlé
Podrî l' sin.ne,
Tot ratindant qu'ine saquî brêsse:
«Ine dièrin.ne!»
Mins lès pwètes sont droviètes
Èt l' frudeûr
Vis sofèle è l' hanète:
«Rintrez, c'èst l'eûre.»

Come on-z-a fini di r'mète
Li sono.
On magn'reût bin 'ne saqwè
D'on pô glot.
Mi, dji m' f'reû bin 'ne gozète
D'åbricots,
Mins tot çou qu'on v' propôse
C'èst 'n-oxo.

L'ome dè bar, di v's-ètinde,
Èst nåhi.
Dèdjà qu'i n'in.me nin l' blues,
Lu, c'èst l' country.
Mi feume, è s' bèdrèye,
Ni pout dwèrmi,
Èt pinse, tot loukant l' rèvèy
«Ça suffit».

Mins nos-ôtes muzicyins,
- Dji n' djåze qui por mi -
On n' sét nin fé 'ne fin,
Qwiter l' sin.ne, li circwit.
S'on a quéquès djins
Po v's-aplôdi,
On dit: « Dj'èl f'reû co bin,
Dji va riv'ni ».

«Hê! as-s' vèyou kimint dji fê co djèmi
Mi Gibson qui vint dès-États-Ûnis?
Po lès cwèdes, c'èst vrêye,
Èles-ont fêt leû timps…
Mins c'èst mîs, dès fèyes,
Po li slide en mi.
- Di djåze trop' di mi,
Awè, dj'èl sét bin.
- Si ti vous, dj' t'aprind
Çou qu' m'a dit Muddy,
Ca dj'a on pô d' timps,
Dji n' so nin trop pris,
Quèstion ègadj'mints…
- Alèz, dji t' rivind bon pris
Ine bwète MXR,
Si t'as l'îdèye di
Djower dè Winter…»