Ik speulde as kind op d'ol boerderij
At klont mit bodder en zoepenbrij
Noa schoultied altied oaventuur
As piebeziedjen in de schuur
Of dunderjoagen in peergaang
Peerden gek en boer op staang
Wat hebben we stropakgangen baauwd
Mit kop in kaf en din benaauwd
Wat haar we n keet - wat ging t ter heer
Dat hevve had: dat komt nait weer
Wat haar we n keet - wat ging t ter heer
Dat hevve had: dat komt nait weer

d'Ol ploats liekt meer op n fabriek
Ain bonk verstainde romantiek
Koien in loopstaal, swienen aan baand
En aal meer kunstmis over t laand
t Gevuil gaait dood - kin nait meer bluien
Want elk bedrief mot haarder gruien
Nog even en boer is der bie tou
Din zel e zeggen: t ging te gaauw
Mor ja din is t mainsttied al te loat
n Loan is din n asfaltstroat
n Sloot n regelrecht kenoal
En boerenproat oroakeltoal

Zo gaauw ze aan t verkoaveln goan
Wort elke bunder n landingsboan
Ze vlaigen op trekkers over t laand
Ol boer mit hannen in buus aan kaant
De zeun het zien ol heer nait veul in reken
En d'ol het zich op 'jong' verkeken
Want jong en old, elk het zien aigen moaten
En t landschop nuigt ook nait tot proaten
Ik speulde as kind op d'ol boerderij
At klont mit bodder en zoepenbrij
Wat haar we n keet - wat ging t ter heer
Dat hevve had: dat komt nait weer. 


Tekst: Ede Staal
Muziek: Age van der Velde