De veugelkes zijn zo gauwe kontent
Ze dragen noch broekske noch vestje
Ze bouwen geen huis van steen en cement
Maar van pluimkes en takskes een nestje

In d'eerde en in 't water in de goot en op 't dak
De godgansen dag zijn z'aan 't ruifelen
in d'haag en de bomen van tak tot tak
Ze tjielpen en ze tjilpen en ze schuifelen

En waar ze dan slapen, op nen stok of nen draad
Voor beddegoed moe'n ze nie zorgen
Z'eten een vliegske een rupske en wat zaad
En d'eikes broe'n da's voor morgen

Ik zou 'k ik geiren een vleugelke zijn
Al was 't maar een mus of een spreeuwe
Of liever ne leeuweik of een zwaluwke fijn
Of een kraaie een duiv' of een meeuwe

Maar 'k ben zo gevangen verslaafd en verwend
Deur de dingen die mie schandelijk bedreigen
De veugelkes zijn met zo weinig kontent
't Is nodig anders kan je nooit vliegen