Diep ut de skacht
(h)oar 'k verzuchten
de minwerkers krigg'n congé
pakken den tring en de vrouwe mee
zoeken de ruste
of trekken noa zee
moar oa'k ik efkes wille vluchten
bluve'k ier, want in ieder geval
ik benne trouw an de stank van de stal
en da kost mie ginnen bal

     'k pakke min vakance ip den top van nen terril
     'k vinde min balance ip dien berg tussen den briel
     'k sloape onder een zeil, zonder luxe, zonder spel
     'k voele mie doa veil(ig) en zoa zoalig in min vel
     'k koke doa min potje en ik leve lik ne prins
     'k frètte me min totje ut een tjele lik de zwins
     'k benne lik Bebèrke ip zin boatje in Motril
     'k voele mie menjeerke ip den top van dien terril

Ik zie het land vanut de (h)oagte
het kastjeel, de kèrk en den burcht
het dorp, de skachten en de lucht
en 't kost mie niets, de vinde'k nog de klucht
'k i proviand stoan in de droagte
prefab frieten, ne steak, ne lap spek
een farde drank, voar a de koave trek
mjeer of genoeg voa minnen bek

     'k goa 'k ik ip vakance noa den top van nen terril
     'k i zel(f)s nen (h)oap chance, 'k vonde jeen da mie beviel
     'k vroage mie soms of wa da'k elders zoe goan doen
     'k vinde da'd ier tof en da kost mie ginne poen
     'k zie vanip dien berg wa da 't leven ons ol biedt
     soms vinde 'k dad erg en soms vinde 'k ik da niet
      't es olsan ambiance, qua vervelinge nihil
      'k pakke min vakance ip den top van nen terril

Moa 't i mie toch ne kjee gespeten
ik krege een vloage ip min dak
en in da zeil da vormde ne zak
en deur den druk e 't spel opengeklak
'k i 't ton moar in den drank gesmeten
twjee bakken bier direk utgefkut
den kortendrank in 1, 2, 3 woas ut
achter een ende woa 'k perlut

     'k Rolde me min botten noa de voet van dien terril
     'k koste nie mjee stoppen, 'k droaide zot gelik een wiel
     ik woare verre wakker, 'k viele van minne sus
     'k kwoame were wakker en 'k a toch zok nen dus
     'k zoage van die bjeest'n, 'k woare hjeel Peter Pan
     't spookt'n zel(f)s ol gjeesten en ne rozen olifan
     'k woare van de boane, 'k kwoame ol verre debiel
     en 'k tsjoolde med een koane noa den top van dien terril

30 Joar lang... bleef Kompel Verrompel
trouw an zinnen terril
't woar'n 30 goodne joaren
moar ommeke, ie kwam ziek
vrjee ziek
en ip zin sterfbedde zei 't ie zachtjes :
ewel, 't goa godverdomme zjere
in nen zwoai en nen droai es 't gedoan
moa 'k ben conten(t) da 'k in min kort bestoan
niemand of niets niet'n i misdoan
'k (h)oare de roep van onzen (h)jere
'k ben me moeite nog 't vel over bjeen
'k i mi gejeun in 't leven lik ginjeen
moa 't e gedoan, 'k moe van olles skjeen

     'k zoed'n willen kussen dienen top van dien terril
     moa 'k kanne ondertussen nie mjee weg, 'k ben immobiel
     de joaren ondergronds i'n min longen ipgefrèt
     min (h)and'n zin verfrons(t) en min voar(h)oaf e bezwjeet
     'k ben verre ipgebran(d), 'k ben van asse en van stof
     min leven lig in d' (h)and'n van den (h)eiligen Christof
     moar miskien e God even speels en juveniel
     en i't ie in zin kot nen persoanlijken terril

     moar miskien e God even speels en juveniel
     en i't ie in zin kot nen persoanlijken terril