Mès camarådes, dihez-m' li vrêye.
Dji n' sé si v's-èstez come mi,
Mins dji m'a d'mandé quéquès fèyes:
Èst-ce si målåhèye di mori?

Dinez-m', dinez-m' li fwèce
D'èsse on pô pus cagnès'.
Mins qwand dj'ètind l' fin dè l' tchanson,
Dji d'mande ine rawète po l' bon.

D'avance, les djins èstît pus deûrs,
S'ènn'alîvèt sins tant d' façons.
On sûvéve djusse li lwè d' nateûre
Tot come si sûvèt lès såhons.

Li ci qu'aveût l' mwért so les dins
Dihéve: dj'a fêt m' pårtèye d'ome.
Èt pus' qu'à m' toûr, dj'a hagnî d'vins
L' dorêye ås pomes.

Prindez m' grand-pére qu'aveût fêt l' guére
Divins lès brôlîs d' l'Yser.
Po 'ne vatche d'ôr, i n'åreût djåzé
Di tos lès cis qu'ont stu gåzés.

Mi-ôte grand-pére, vos l' kinohez,
C'èsteût Jules, loumé l'Amûzète.
I n' pinsa måy di s'ènn'aler,
Såf bin sûr po sûre ine rossète.

Mins mi, mès djins, dj' so on couyon.
Rin qui d' lére li pådje mortuwêre,
Come on dit d'vins 'ne vîle tchanson,
Dj' a l' coûr èt l' cou qui s' rèssêre.