vroag een Grunneger boer, net geliek vee of baauw 
woar goan joe dit joar mit vekaanzie noar tou 
din zeg e: k heb te drok of ik heb t nait zo dik 
moar belangriekste reden dij joe heuren denk ik 
is dat prachtige Grunneger laand dus wat mout 
ik as boer op vekaanzie want ik heb t hier ja goud

as vekaanziebestemming zo ain moal in t joar 
is Middellandse Zee nog net nait zo roar 
moar as ik den bie ons over Waddenzee stoar 
of op fietse deur n gele zee koolzoadvelden voar 
of an t snouken bin an t Westerwietwerdermoar 
den denk ik bie miezulf: kloar

de gemiddelde Grunneger wil gain gezoes 
dij komt echt nait mit drij, vaaier kilo folders in hoes 
sloager oet Stainstilstroade scheurt noar t Schildmeer 
en zet bie Boei 12 - hup! zien caravan neer 
ietsmoaker oet Stad moakt het ook nait te dol 
stait elk joar mit zien tent even veurbie Potjewol

al bin ik vergruid mit het Kolle Gat 
Grand Canyon liekt mie ook wel wat 
k bin in Zuud Frankriek en op Corsica west 
en k heb mie best vernuverd in Zuud Engeland lest 
moar d'allermooiste tocht dij ik ooit ondernam 
was op t fietske van Stad noar Waarffum over Onderdendam


(c) P. de Haan/ F.J. den Hollander