Je hebben sums n moment, wel kin dat nait
Dat je allinneg weden wil
t Hoge Laand geft mie die rust
In allervrougte, t is doodstil 
t Is fluusterg en takken van bomen
Goan zachies hinneweer 
Om dizze stilte zo te holden
Fluuster je zulfs nait meer

t Is n veurrecht hier te leven
Je staait der nait aaltied bie stil
Goa je t mit wat ook vergelieken
Din maark je het verschil
Ik huif echt nait zo neudeg vot
Ik mis de roek en kleur
As t koolzoad staait in volle blui
Blief ik laiver dicht bie deur

Daauw verdwient, zun komt op
k Vuil de eerste zunnestroal
Laankoet in t gras, haanden onder kop
Lig k te dreumen in onderwaal
Daauweln op noodweg, richten hoes
Onderwegens blief k evenpies stoan
k Tuur over baauwte tegen zunne in
En loat mien gedachten goan

k Bin allinneg, mor k vuil mie best
Aineghaid kin ik nait
t Leven is hier mie ales weerd
Ik heb hier gain verdrait
Zun gaait onder, k goa aan zied
t Was n laange dag
k Vaal in sloap en k dreum dij naacht
Van t laand dak zo geern mag 


Tekst en muziek: Age van der Velde