Mien vrouwe zie mien up n’een dag
Dasse da zo geren zag
Ze wilde d’er e poare en
Die past’n bie n’eur kleern
Van die kunstnageltjes in acryl
economisch nut nihil
Mo ze bleef mo vraagn 
En ze bleek mo zaagn
Vuve zesse zeevn keern

’t is niet dank ik e kreute zien
Ze kan zie echt nie klaagn van mien
Ze mag zie regelmoatig
E sommetje spendeern
Mo kunstnagels da kreeg ze nie
Dan voen ‘k ik geldwegsmieterie
Mo ze bleef mo fleemn
En ze bleef mo zeemn
Vuve zesse zeevn keern

Toen zei ze zie da go joen spietn
Ze begost toen up eur nagels bietn
Den uusdokteur zei meisje toch
Je got dat of moetn leern
Ze zei dokteur da lukt mien nie
Wa kunk ik doen, wa peis je gie
‘k zien bezeetn lik zot
‘k bietn ze heel kapot
Vuve zesse zeevn keern

Ik peisde wacht e bitje si
Ik weetn ik e remedie si
Ze go zie nie stief lange mi
Eur nagels attaqueern
Ik dopt ze in terpentien
Ik wreef ze in me wienazien
Mo ze bleef mo klaagn
Olle daagn
Vuve zesse zeevn keern

uuteindlijk enk ik toe moetn geevn
Mo ‘k en nu e heel ander leevn
Ik en ik nu uut noodzake 
E heel’noop diegn moetn leern
Ze kan zie nu gin teetn mi maakn
Want eur nageltjes zoen of kunn kraakn
Ze zit te vieln
En d’erbie te kwieln
Vuve zesse zeevn keern

Mo ’t schonste nog van heel dat spil
Dat is dat da nie stoppen wil
Ze bluuf zie mo die nagelstudio
Daaglijks visiteern
’t is nodig zeg ze dasse ’t doet
Ze moet doar goan voe ‘t oenderhoed
Voe ze bie te kleurn
En up te fleurn
Vuve zesse zeevn keern