Wy Friezen spatte eins amper út 'e bân 
wy binn' bekend as 't folk fan 'tuike, tuike oan' 
ús ja is ja, ús nee is nee, en as sy freegje: hoe is 't mei dy 
dan koe it wol minder en dat is al better as gewoan 
in Fries allinnich rekket nearne fan oerstjoer 
ek al brânt der yn him noch sa'n hillich fjoer 
mar binne wy mear as mei ús trijen, binne wy net mear stil te krijen 
leit de massa-hystery fuort op de loer 

Lit jim gean Friezen, Friezen lit jim gean 
bliuw net sitten, stive Friezen, jim moatte stean 
jim moatte roppe, raze en balte, krekt as binne jim net al te al te 
lit jim gean Friezen, Friezen lit jim gean 

Nei twa kear nachtfroast wol de Hollanner der foar 
hy ropt om 't hurdst: 'De tocht der tochten, die gaat door' 
mar wy Friezen witte better, iis is samar ek wer wetter 
en dus hâlde wy de kiezzen op elkoar 
mar hearre wy Henk Kroes dan sizzen: 'It giet oan' 
ferlieze al dy nochtere Friezen har ferstân 
mei op de kop in Unox-petsje en by elk beferzen sleatsje 
stean' de kampioenen fan it ûnferstân 

En bliuwt it winters alle nachten boppe nul 
dan gau nei Tsjalf op it Hearrenfean mei it hiele spul 
nei Tony, Ids en rappe Rintsje, oe wat in kontsje hat dat fintsje 
it giet hjir om goud, nee dit is echt gjin flauwekul 
en al is ús pake fiifensantich jier 
de harsens read-wyt-blau, hy fervet sels it hier 
en giet de wave dan oer de banken, kin ús pake hast wol janke 
mar hy wavet mei, al docht it sear, ja stjerrend wier 

En yn dat stadion dat nei ús Abe is ferneamd 
heart elke fuotbalgek dochs út syn dak te gean 
mar ik hear amper minsken sjongen, se koene wol lêst ha fan de longen 
binne dit no werklik wol de fans fan it Hearrenfean 
earst as it goed giet, fielt de Fries him dan ferbûn 
klinkt yn De Kuip it Frysk folksliet sels yn 't rûn 
en al snapt gjin spiler wat wy roppe, wy sjonge troch, dan mar foar Foppe 
wy hâlde fol, al wurde wy noait ris kampioen 

Doede koarsang en kontrabas Gurbe haadsang en gitaar 
Jaap koarsang en gitaar Piter koarsang en banjo