Èl progrès tous les djoûs s’avance
Chaqu’ djoû vwat d’nouvel indvinctions
Les marchands pou’ s’fê l’concurance
Fass-tè dè l’réclame pa miyons
On vwayadge in otomobile
In aréyoplane, in balon
Les tchfaus sont dèvnus inutiles
Pou les tchèrètes, pou’ les camions

Mais du tamps dès m’grand-mère
On n’parlout nin d’tout ça
On crwayoût à sorcières
On alvoût ses pourchas
On fzoût ses commissions
Pou train dès cordonnîs
Pou daler deû eûres lon
On daloût co à pîds

L’eûre d’audjourdû grâce à l’twalette
Tous les djins sont dèvnus Monseûs
Toutes les feûmes mète-lè des vwaletes
On né rcounwat pus les bribeûs
Métnant pou habiyî n’djônne fîye
Faut des trèsses, i faut des chichis
Les pus lèdes sont co foûrt djoliyes
Grâce à l’odeûr dèl’poude dè riz

Mais du tamps dè m’grand-mère
On n’parloût nin d’tout ça
Pou fé chèrvî d’jaretière
On mtoût in bleu cordia
On savoût fê s’twalète
Avû in chale à fleûrs
Ène pètite sandrinète
Èy in ptit scoû d’couleûr

Pou les omes come pou les coumères
Yeusse étou vont avû l’progrès
Is sont dèvnus telmint si fières
Qu’i n’faut pus qu’des places d’ampwayès
Byin des ouvrîs pindant l’sèmène
Sont habiyis come des barons
L’tailleûr souvint dwat s’mète in pène
Pou fé n’poche pou muchî l’flacon

Mais du temps dè m’grand-mère
On n’parloût nîn d’tout ça
Pou l’diminche èm’ grand-père
N’a jamés yenu d’capia
Il avoût in sauro
Ène waute casquète dè swa
A ses pîds dès chabots
I stoût fièr come in rwa

Mètnant on mèt les èfants à scole
Duscû’invî quatorze ét quinje ans
On leû foûre toutes sortes dins l’boussole
Dviène t’ingénieûrs ou bin jérants
Tous lès èfants sont sâdges come dè lives
I n’da pus qui pâle tè walon
On n’counwat pus l’porèye d’indives
I n’faut pus qu’des grives ét du saumon

Mais du temps dè m’grand-mère
On n’parloût nîn d’tout ça
Bin rarmint dins l’soupière
On trouvoût in ocha
On daloût à l’escole
Al fosse dè Saint-Bouvî
Adon çu ç’qu’astoût drole
C’it d’vîr in ome instrwit

Èm’ grand-mère pou alver s’famiye
A yeû mile rujes, mile z’imbaras
Il avoût quate garçons, quate fiyes
Çu qui fzoût dja on bia moncha
Mais quand ç’astoût l’nouvèle anèye
Ou bîn l’souper dèl nûtt des rwas
I faloût vir ça, qué tricléye
Qu’on trouvoût réyunîe doulà

Mes mononkes, mes matantes
Mes cousines, mes cousins
On stoût co pus q’quarante
Il avoût d’l’amûsemint
On dansoût s’rigodène
Pou amuser m’grand-pè
On tchantoût chacun l’ciène
Dvant dè s’mète à souper