È m' famile on n'a
Nin bêcôp di r'lidjon.
Qwand m' bèle-fèye acoûka,
On m'a pôsé l' quèstion:
«Vos n' crèyez à rin, mins
Poqwè priver li p'tite
D'on si bê sacramint
Qui fêt qui l' diâle rispite?»

Ni fåreût-i nin,
N'èst-ce nin l' moumint,
Di l'èwalper è s' coufin
Èt d' fé batizer l' gningnin? (bis)

Spritchî d' l'êwe so 'n-èfant
Ni rîme à rin, di-st-on.
Mins fans-gn' må tot sûvant
Li principe di précôcion?
Ca sårîz-v' måy dîre
Çou qu'i-n-a d'vins l' cîr,
Houte dès foumîres èt dès crasses
Qu'on-z-èvôye è l'èspace?

L'afêre ni costèye rin
Èt pout fé l' pus grand bin.
C'èst tot come li Lotto:
Ça pout rapwèrter gros.
Fåt mète, po-z-èsse pus sûr,
Totes lès tchances di s' costé.
Èsse batizé, c'èst r'çûre
Li carte Avantage dè G.B.

Li paradis, c'èst cåzî
L' Club Méditerranée.
À l'intrêye, on-z-a scrît:
«Cette plage est privée!»
Èt si v's-avez roûvî
L' prumî dreût d'inscripsion,
On v' ritchôke à côps d' pid
Divins l' barque da Charon.

S'i fåt m' batizer 'ne fèye,
Ci n' sèrè nin åhèye.
N-a qu' l'êwe d'on Canadair
Qui pout m' såver d' l'infiêr.
Si l' cisse qui vos m' dinîz
Nawêre avou vos lèpes
N'î fêt rin, fårè vûdî
Li bårèdje dè l' Gileppe, etc.