Dji d'hind vès Moûse 
Avou mi vèdje è m' tchin. 
Dji so l' pèheû
Dè dîmègne å matin.

Djoyeûs pèheû
N'a nin mèzåhe d' pèhon,
Djoyeûs pèheû
N'a nin mèzåhe d' tchanson,
Djoyeûs pèheû
N'a nin mèzåhe d' Mayon,
Quand d'vins s' cabas,
I-gn-a dès pôrvuzions.

Dji d'fê m' banstê 
Adon dji mète è m' hô 
Ine dimêye wafe
Èt ine bwète di warbôs.

Volà m' lignoûle 
Inte deûs crasses qui flotèt.
N'èst-ce nin l' moumint
Di s' ramouyî l' bûzê?

Come i n' fåt nin 
Fé dè brut po l' govion,
Dji pou seûl'mint
Beûre à tos p'tits goûrdjons.

Doze eûres sonèt. 
È l' nasse, n'a todi rin, 
Qui treûs botèyes
Èt dè l' tripe ås rèzins.

C'èst trop pô d' dîre
Qui dj' rinteûrrè hign'té. 
Mins qu' ci n' seûye nin
È l'êwe si dj' deû toumer.