Li vint sofèle
Doûç’mint so Moûse.
On n’ dîreût minme nin qu’èle sût s’ coûsse.
Ènn’a qui pinsèt qu’èle dihind
Qwand èle roûvèye di wice qu’èle vint.
	
Mins n’ tapez nin,
N’ tapez nin l’ pîre
A l’êwe si fris’ qu’a djusse surdou
Èt qui rèsconteûre tant d’ourbîres
Wice qu’on prind lès coleûrs dès broûs!
	
In-ôte l’a dit :
Mins wice sont-èles,
Lès glèces qui d’hindît l’an passé
Dizos l’ pont-d’s-Åtches? Minme lès pûs fîrs
Dès hirôs d’îr sont rèvolés.
	
Mins wice sont-èles,
Lès bèlès loumîres
Qui lûhît tot dè long d’Ougrêye
Qwand clignéve, avou l’industrèye,
On mèye d’oûy divins lès foumîres?
	
Wice so-dje asteûre,
Mi minme?
Dji m’ crèyéve d’avance so l’ rîve gôche,
Mins dj’a pris l’ bac èt d’ l’ôte costé,
Dji di qu’ lès djins sont trop’ gåtés.
	
Djône, dji tûséve
Qu’i faléve sûre,
Po rimpli s’ timps, bin pus’ qu’ine vôye.
C’èsteût compter sins lès cous-d’-sac
Qu’on prind qwand li vèye vis plôye.
	
Adon prindans
L’ batê walon.
Po rintrer ci sèrè l’ dièrin,
Èt mi tchanson d’ papî d’ lombård
Vos tinrè k’pagnèye on moumint.
	
Li vint sofèle
Doûç’mint so Moûse.
Li hôt-fornê d’ Tchèrtal hufèle,
Come dji m’ènn’è va , tot tûzant :
Quî n’ candje nin è-st-i bin vikant?