Dji n’ sé pus çou qu’ dj’aléve fé la.
Li rouwale Pèkèt èsteût neûre,
Èt i-n-èsteût nin minme cinq’ eûres.
	
C’è-st-a ponne si dj’ m’arèsta
Wice qui m’ mame, djône fèye, dimora.
Poqwè fåt-i qu’ dj’î tûze seûl’mint
Lès djoûs qu’i-n-a dè måva timps?
	
Faléve soner al pwète,
Prinde li colidôr, djusse po vèy,
Å coron, come ine coûr coviète
Wice qui m’ grand-mére féve lès bouwêyes.
	
Après çoula, gn-aveût ‘ne couhène
Avou sès deûs fôteûys Voltaire,
On calandriyé so l’Årdène
Èt l’ radio qui passe l’INR.
	
Covrant m’ fôteûy, ine saqwè d’ bê,
Cozou avou dès bokèts d’ linne
Di pus d’ coleûrs qu’ènn’a l’êrdiè.
Dji v’ l’atch’tèye, si vos-avez l’ minme.
	
Dèl sitoûve, dji n’ sé pus rin.
Èsteût-èle plate, èsteût-èle ronde ?
Mins l’årmå èt çou qu’aveût d’vins,
Sins bargougnî, dji v’s-èl raconte.
	
È ridant d’ dreûte, lès clés,
A hintche, lès çanses, lès lunètes,
Å-d’zeûr in-andje, èt sol costé
Nom di Dju! mi ! avou m’ bonète!
	
Èl rowe, dji n’a fêt qu’ passer.
L’ mohone èsteût dèdja tote neûre.
Poqwè s’arèster po trover
Qu’i-n-a cåzî pus rin qui d’meûre?