The provost's ae dochter wis walkin her lane
O bit her luve it wis easy won
Whan she spied a Scots prisoner a makin his mane
Aye an she wis the flouer of Northumberland

It iss "O, gin a lassie wad marry me?
O gin her luve it wis easy won
A wad mak her a ladie o heich degree
If she'd lowse me out frae my prison sae strang"

Sae to she's dune her doun tae her faither's guid stocks
O bit her luve it wis easy won
An she's stolen the best keys thair for mony's a brave lock
For tae lowse him oot frae his prison sae strang

An it's she's dune her doun tae her faither's guid stables
O bit her luve it wis easy won
An she's stolen the best horse that wis baith fleet an able
For tae cairry thaim back tae bonnie Scotlan

Bit as thae were a ridin across yon Scots muirs
He cried, "O bit yer luve it wis easy won
Get ye doun frae my horse, ye're a brazen-faced hour
Altho ye're the flouer o Northumberland"

"O, it's cook in yer kitchen I shairly will be
O bit my luve it wis easy won
For I cannae gae back tae my ain countrie
Altho A'm the flouer o Northumberland"

"O, it's cook in my kitchen ye cannae weill be
O but yer luve it wis easy won
For my ladie she will nae hae sairvants like thee
An ye'll need tae gae back tae Northumberland"

"For it's I hae a wife in my ain countrie
O bit yer luve it was easy won
An A cannae dae naethin wi a lassie like thee
An ye'll need tae gae hame tae Northumberlan"

An, sae laith wis he yon lassie tae tine,
O bit her luve it wis easy won
So he's hiret an auld horse an he's hiret an auld man
For tae cairry her back tae Northumberland

Bit it's whan she got thair her faither did froun
An said "O bit yer luve it was easy won
For tae gang wi a Scotsman whan ye're barely saxteen
Aye an ye were the flouer o Northumberland"

Bit it's whan she gaed ben her mither did smile
An said "O bit yer luve it was easy won
But ye're no the first that thon Scots has beguilet
An ye're walcome back hame tae Northumberlan"

"For ye winnae want breid an ye winnae want wine
Altho yer luve it was easy won
An ye winnae want silver tae buy a man wi
An ye're aye the fair flouer o Northumberland"