Moeke, vertel nog ais van vrouger
Vertel mie toch nog ais van dou
As het zol kinnen, laive moeke
Zollen ie din weer ales over doun?
Zollen wie soamen weer goan zingen
De mooie laidjes van weleer?
Van “Op de grote stille heide”
Tot “Die gitarre und das meer”

Zolst mie din ook weer aandoeken moeke
As ik weer ais valen was?
Zol k din ook weer op tjak kriegen
As k haar stoan stampen in n plas?
Mit ons baaident kieken noar heilsoldoaten
Aal zundoagen op houk van onze stroat
Dij dou hail mooi konnen zingen
Onner lanteern soavends loat

Zol k din ook weer buussinten kriegen
Even weer t gevuil “wat bin ik riek”
En as lier “d’Arabier” deur ons stroat kwam
Soamen weer lustern noar zien meziek
Mos k din ook weer aal zoaterdagen 
In wasketob mie wazzen goan
Mog k din ook weer knoien moeke 
k Haar aal t wotter op keukenvlouer stoan

Dit en doezend aander dingen
Dij ik mit mien moeke dee
t Binnen nog slechts herinneringen
Net as golven op roege zee
Mien laive, allerlaifste moeke
Wat der is en nait meer was
t Dut zeer, mor hail veul loater
Waardeer je aal dij dingen pas.