Geboren en opgruid in t Groot Loug
In wiek 'de Oosterpoort'
t Was een noflek noaberschop
Plezaaier was t sleutelwoord
Een wereld kinder doudestieds
t Was aaltied drok op stroat
Noa schoultied wer der boeten speuld
As blikspuut, landverroad
Verlösken, koeltjen, bakjegooien
Ook tiepeln was te gek
Hoelahoep en tollen op stroat
Aan spelletjes gain gebrek

Dat dail van Stad dat bie mie t hoogste scoort
Blift ongetwiefeld wiek 'de Oosterpoort'
t Zuderpaark en Oosterweg 
As ook de Meeuwerderboan 
Veemaartstroat, Winschoterdaip 
t Blift aaltied bestoan 

Aan d'overkaant van mien hoes
Was t plietsieconsuloat
Binnenkaant heb ik een poar moal zain
Wegens t kattekwoad
Op 'Riekensschoul' heb ik lezen leerd
Sommen moaken, je zong n laid
Van schoul verplicht noar t badhoes tou
Want n does thoes haarve nait
Ainmoal in week was t baistemaart 
Wat haarve doar plezaaier
Deensdoags ekstroa drok in wiek
Veul boeren en kooplu mit heur daaier

Schoul en badhoes bestoan nait meer
Ook nait ol baistemaart
As je nou plietsie neudeg hebben
Mou je noar Roademaart 
Op plek van kerk in Paarkloan
Stoat nou n bejoardentehoes
En kom k bie tieden op fietse laangs 
Vuil ik mie even weer thoes 
Mien kindertied beleef ik weer
k Zug mie weer speulen op stroat
Mien jonkhaid goat in n flits veurbie
Ik wait dat dit nooit over goat 



Tekst en muziek: Age van der Velde.