Ede Staal

Ede Staal
De nacht

't Is vroug nog in de murgen
En guster is al vlucht
De eerste fiets trapt deur de stad
De eerste roker kucht
De radio die kwedelt
Ik heur dat ik niks heur
En deur 't gedien kropt 't eerste licht
Mor doe bist ter vandeur

De nacht dij is noeit eerlek
Of ligt 't sums aan mie
Zo kort astoe bie mie bist
Zo laank, laank zunder die
Zo waarm deur dien oadem
Zo kold as d'oostenwind
As ik die zuik, en nog es zuik
En toch noeit, toch noeit vindt

't Is nog mor 'n poar uur leden
Toun leek mie murgen nog zo ver
Wie lagen doar in ons tentje
En nou is 't gewoon 'n ber
Want nou is 't gewoon weer murgen
En ber is al weer kold
Kamperen of kreperen
Zo wor je langzoam old

Geluden van de eerste train
Dij sliestern deur de stroaten
Ik moak mor thee en bin allain
'k Zit in miezulf te proaten
'n Klok dij luudt 'n knitter
In 't matglas van mien denken
'k Hol theepot sikkom op de kop
En 'k blief aingoal mor schenken

De nacht dij is noeit eerlek
Of ligt 't sums aan mie
Zo kort astou bie mie bist
Zo laank, laank zunder die
Zo waarm deur dien oadem
Zo kold as d'oostenwind
As ik die zuik, en nog es zuik
en toch noeit, toch noeit vind
Toch noeit vindt

Sanderxx

Submitted by Sanderxx at Mon 09 Apr, 2012 10:18 pm

delightyourears

Last updated by delightyourears at Wed 16 Jan, 2019 5:50 pm

Author: Ede Staal
Composer: Ede Staal
Publisher: Mollebone Music
Published in: 1986
Language: Dutch
Available on: As vaaier woorden (1986)

Reactions

CommonCrawl [Bot]

Follow Muzikum